मोहम्मदवाडी-NIBM परिसरातील नागरिकांना अखेर नियमित पाणीपुरवठा ; मुख्यमंत्र्यांनी केला पाठपुराव्याचे कौतुक

पुणे : मोहम्मदवाडी, दोराबजी पॅराडाईज, एनआयबीएम आणि आसपासच्या परिसरातील नागरिकांच्या अनेक वर्षांच्या प्रतीक्षेनंतर अखेर समान पाणीपुरवठा योजना अंतर्गत नियमित पाणीपुरवठ्यास सुरुवात झाली आहे. या पार्श्वभूमीवर आयोजित कार्यक्रमात मुख्यमंत्री Devendra Fadnavis यांनी नागरिकांच्या सातत्यपूर्ण पाठपुराव्याचे विशेष कौतुक केले.

 

महाराष्ट्रात व्यापक स्वरूपात ‘कर्करोग ग्रीड’ उभारणार – मुख्यमंत्री देवेंद्र फडणवीस

 

 

मुख्यमंत्री फडणवीस म्हणाले की, या भागातील नागरिक, विविध संघटना आणि NIBM Annex Forum तसेच MURWDF Forum यांनी सातत्याने प्रशासनाकडे पाठपुरावा केला. “काही नागरिक तर आठवड्यातून एकदा ‘हे काम कधी पूर्ण होणार?’ असा एसएमएस पाठवत होते. आज त्याच नागरिकांच्या घरी पाणी पोहोचत असल्याचा आनंद आहे,” असे त्यांनी सांगितले.

 

पुण्यातील वाढत्या पाण्याच्या गळतीच्या समस्येवर भाष्य करताना मुख्यमंत्री म्हणाले की, देशात प्रति व्यक्ती सर्वाधिक पाणी पुण्याला मिळते, असा दावा केला जातो. मात्र प्रत्यक्षात नागरिकांना पुरेसा पाणीपुरवठा होत नव्हता. शहरात जवळपास 40 ते 50 टक्के पाण्याची गळती होत असल्याने 2015 मध्ये समान पाणीपुरवठा धोरण राबवण्याचा निर्णय घेण्यात आला.

 

या योजनेअंतर्गत मजबूत वितरण व्यवस्था उभारून प्रत्येक थेंबाचे नियोजन करण्याचा प्रयत्न करण्यात आला आहे. त्यामुळे पाण्याचा अपव्यय कमी होऊन प्रत्येक घरापर्यंत नियमित पाणीपुरवठा पोहोचवणे शक्य होत असल्याचा दावा प्रशासनाकडून करण्यात आला. मुख्यमंत्र्यांनी या प्रकल्पासाठी केंद्रीय राज्यमंत्री Murlidhar Mohol, मंत्री Chandrakant Patil आणि महापालिकेतील अधिकाऱ्यांच्या प्रयत्नांचाही विशेष उल्लेख केला.

 

या कार्यक्रमात NIBM Annex Forum आणि MURWDF Forum यांच्या जनआंदोलनाचा गौरव करण्यात आला. अनेक वर्षांच्या संघर्षानंतर अखेर परिसरातील नागरिकांना नियमित पाणी मिळण्यास सुरुवात झाल्याने समाधानाचे वातावरण निर्माण झाले आहे.

 

मोहम्मदवाडी-NIBM परिसरात नियमित पाणीपुरवठा सुरू; मुख्यमंत्र्यांचे नागरिकांना कौतुक