नसरापूर अत्याचार प्रकरण : पुण्यात चिमुकलीला न्यायासाठी मूक मोर्चा, आरोपीला कठोर शिक्षेची मागणी

Pune Silent March पुणे, १० मे : नसरापूर येथे अल्पवयीन चिमुरडीवरील अत्याचार आणि हत्येच्या घटनेनंतर राज्यभरातून संताप व्यक्त होत असून, रविवारी पुण्यात या घटनेच्या निषेधार्थ मोठा मूक मोर्चा काढण्यात आला. समस्त पुणेकर नागरिक आणि विविध सामाजिक संस्थांच्या संयुक्त विद्यमाने आयोजित या मोर्चात मुलीच्या कुटुंबीयांसह हजारो नागरिक सहभागी झाले होते.

Land Titling Act Maharashtra। जमीन व प्रॉपर्टी वादांना ब्रेक? महाराष्ट्रात येतोय नवा कायदा   

बालगंधर्व चौकातून सुरू झालेल्या या मूक मोर्चाची सांगता डेक्कन येथील स्वातंत्रवीर सावरकर स्मारकाजवळ करण्यात आली. सहभागी नागरिकांनी हाताला काळ्या फिती बांधून निषेध नोंदवला. तसेच “चिमुकलीला न्याय मिळालाच पाहिजे”, “आरोपीला कठोर शिक्षा झालीच पाहिजे” आणि “आम्हाला सुरक्षित वातावरण हवे” अशा आशयाचे फलक हातात घेतले होते.

मोर्चामध्ये महिलांची उपस्थिती विशेष लक्षवेधी ठरली. “आम्हाला केवळ योजनांची घोषणा नको, तर मुलींसाठी सुरक्षित समाज हवा,” अशी भावना अनेक महिलांनी व्यक्त केली.या मोर्चात अभिनेते प्रवीण तरडे, विश्वजित देशपांडे, ऋणाल कुलकर्णी, शेफाली वैद्य, धीरज जोशी, ऋषिकेश सुमंत आणि किशोर पोकळे यांच्यासह विविध सामाजिक संस्थांचे प्रतिनिधी आणि राजकीय कार्यकर्ते सहभागी झाले होते.

पीडित मुलीच्या कुटुंबीयांनी सांगितले की, “हा मोर्चा कोणत्याही व्यक्ती किंवा पक्षाविरोधात नसून समाज अजूनही संवेदनशील आणि जिवंत असल्याचा संदेश देण्यासाठी आहे. केवळ आमच्या मुलीसाठी नव्हे, तर अशा सर्व पीडितांना न्याय मिळावा यासाठी नागरिक एकत्र आले आहेत.” मोर्चाच्या शेवटी घटनेच्या निषेधार्थ प्रतीकात्मक आंदोलन करण्यात आले. नागरिकांनी सरकारने महिलांच्या आणि मुलांच्या सुरक्षेसाठी अधिक कठोर उपाययोजना कराव्यात, अशी मागणी केली.