पुणे : शहरातील अनेक पेट्रोल पंपांवर गुरुवारी वाहनांच्या लांबच लांब रांगा पाहायला मिळाल्या. त्यामुळे नागरिकांमध्ये काही प्रमाणात चिंतेचे वातावरण निर्माण झाले. मात्र, अधिकाऱ्यांनी आणि पेट्रोल पंप चालकांनी स्पष्ट केले आहे की ही परिस्थिती पेट्रोल किंवा डिझेलच्या टंचाईमुळे नसून तेल कंपन्यांच्या नव्या पेमेंट धोरणामुळे निर्माण झाली आहे. (pune petrol pump queues advance payment policy fuel supply update 2026)
मिळालेल्या माहितीनुसार, तेल कंपन्यांनी पेट्रोल पंप चालकांसाठी इंधन पुरवठ्यावर ‘अॅडव्हान्स पेमेंट’ची अट लागू केली आहे. यापूर्वी पंप चालकांना क्रेडिटवर इंधन मिळत होते, मात्र आता ही सुविधा बंद करण्यात आली आहे. त्यामुळे अनेक पंप चालकांना तत्काळ पैसे भरणे शक्य झाले नाही आणि शहरातील सुमारे २० ते ३० टक्के पेट्रोल पंप तात्पुरते बंद ठेवावे लागले.
Maharashtra Weather Update : ३०-३१ मार्चला वादळी पाऊस, विजांचा कडकडाट आणि गारपीटीचा इशारा
ऑल इंडिया पेट्रोल पंप असोसिएशनचे प्रवक्ते अली दारूवाला यांनी सांगितले की, शहरात पेट्रोल-डिझेलची कोणतीही कमतरता नाही. “ज्या पंप चालकांनी अॅडव्हान्स पेमेंट केले आहे, त्यांना नियमित इंधन पुरवठा सुरू आहे. मात्र, वेळेवर पैसे न भरू शकलेल्या चालकांना पुरवठा थांबवण्यात आला आहे,” असे त्यांनी स्पष्ट केले.
गुरुवारी बँकांना सुट्टी असल्याने अनेक पंप चालकांना वेळेत पैसे भरता आले नाहीत, त्यामुळे परिस्थिती अधिकच गुंतागुंतीची झाली. परिणामी, ज्या पंपांवर इंधन उपलब्ध होते, त्या ठिकाणी वाहनांच्या मोठ्या रांगा लागल्या. सिंहगड रोड परिसरात याचा मोठा परिणाम दिसून आला. विठ्ठलवाडी परिसरातील एका पंपावर ‘पेट्रोल-डिझेल संपले’ असा फलक लावून पंप बंद ठेवण्यात आला होता. माणिकबाग, वडगाव धायरी आणि इतर भागांमध्येही अशीच परिस्थिती दिसून आली, जिथे नागरिकांना दीर्घकाळ प्रतीक्षा करावी लागली.
या अचानक निर्माण झालेल्या परिस्थितीमुळे काही नागरिकांमध्ये घबराट निर्माण झाली आणि अनेकांनी अतिरिक्त इंधन भरण्याचा प्रयत्न केला. त्यामुळे गर्दीत अधिक वाढ झाली. मात्र प्रशासनाने स्पष्ट केले आहे की, घाबरण्याचे कोणतेही कारण नाही. पुणे पेट्रोल डीलर्स असोसिएशनकडून सांगण्यात आले की ही समस्या पूर्णपणे तात्पुरती असून लवकरच परिस्थिती पूर्ववत होईल. नागरिकांनी अफवांवर विश्वास ठेवू नये आणि अनावश्यक गर्दी टाळावी, असे आवाहन करण्यात आले आहे.
“जिल्ह्यात पेट्रोल आणि डिझेलचा पुरेसा साठा उपलब्ध आहे. इंधन पुरवठा पूर्णपणे सुरळीत सुरू आहे. कोणतीही टंचाई नाही, त्यामुळे नागरिकांनी चिंता करू नये.” — जितेंद्र डुडी, जिल्हाधिकारी, पुणे
