Pune Municipal Election 2026 । ईव्हीएम बंद, शाई पुसली, बोगस मतदान! पुणे निवडणुकीत मोठा गोंधळ !

 

Pune Municipal Election 2026। पुणे : ईव्हीएम मशीन वारंवार बंद पडणे, बोगस मतदानाचे आरोप, मतदार यादीतील गोंधळ, पैसे वाटपाच्या तक्रारी आणि मतदारांच्या बोटावर लावलेली शाई सहज पुसता येणे अशा अनेक वादांमध्ये गुरुवारी पुणे महानगरपालिकेच्या निवडणुकीसाठी मतदान पार पडले. अंदाजे शहरात एकूण मतदान 50 ते 55 टक्क्यांदरम्यान राहण्याची शक्यता आहे. 41 प्रभागांतील 163 जागांसाठी रिंगणात असलेल्या 1,165 उमेदवारांचे भवितव्य आता ईव्हीएममध्ये बंद झाले आहे. पुण्याचा पुढील ‘कारभारी’ कोण, हे मतमोजणीनंतर स्पष्ट होणार आहे.

 

2017 नंतर प्रथमच होत असलेल्या या पंचवार्षिक निवडणुकीसाठी गेल्या काही दिवसांपासून पुण्याचे राजकीय वातावरण तापले होते. पुणे महापालिकेच्या 41 प्रभागांतील 165 जागांसाठी निवडणूक होत असून त्यापैकी दोन जागा बिनविरोध ठरल्या आहेत. उर्वरित 163 जागांसाठी गुरुवारी शहरातील सुमारे 4,011 मतदान केंद्रांवर मतदान झाले. सकाळच्या सत्रात मतदानाचा वेग मंद होता, मात्र दुपारनंतर काही केंद्रांवर लांब रांगा पाहायला मिळाल्या. तरीही अनेक भागांत मतदारांचा अपेक्षित उत्साह दिसून आला नाही.

 

मतदार यादीतील गोंधळ
मतदान सुरू होताच प्रशासनातील त्रुटी समोर आल्या. मोठ्या संख्येने मतदारांना मतदान पावत्या मिळाल्या नव्हत्या. अनेक नागरिक मतदान केंद्रावर गेल्यानंतर त्यांचे नाव वेगळ्याच केंद्रात नोंदवले असल्याचे समोर आले. काही कुटुंबातील सदस्यांची नावे वेगवेगळ्या प्रभागांमध्ये असल्याचे आढळले. अनेकांना घरापासून दूर असलेल्या मतदान केंद्रांवर जावे लागले.

 

ईव्हीएम बिघाडामुळे विलंब
अनेक मतदान केंद्रांवर ईव्हीएम मशीन बंद पडल्याने मतदानात अडथळे निर्माण झाले. सकाळी लवकर मतदान करून कामावर जाणाऱ्या मतदारांना तासन्‌तास वाट पाहावी लागली. प्रभाग 41 मधील साळवे नळी येथील विजडम हायस्कूल, प्रभाग 39 मधील हुजूरपागा आणि प्रभाग 40 मधील येवलेवाडी येथे ईव्हीएम बदलण्याच्या घटना घडल्या.

 

शाई पुसण्याचा वाद
यंदा मतदारांच्या बोटावर पारंपरिक शाईऐवजी मार्करचा वापर करण्यात आला होता. ही शाई थिनर, सॅनिटायझर आणि नेल पॉलिश रिमूव्हरने सहज पुसता येत असल्याचे अनेक ठिकाणी दिसून आले. त्यामुळे बोगस मतदानाची शक्यता निर्माण झाली. धायरी भागात शाई पुसल्याच्या संशयावरून एका व्यक्तीस राष्ट्रवादी काँग्रेसच्या कार्यकर्त्यांनी मारहाण केल्याची घटना घडली, ज्यामुळे परिसरात तणाव निर्माण झाला.

 

बोगस मतदान व हिंसाचार
काही मतदार यादींमध्ये एकाच व्यक्तीचे नाव दोन वेळा असल्याचे आढळले. आधार कार्ड व मतदार यादीतील नावांमध्ये तफावत असल्याने अनेक मतदारांना मतदान करता आले नाही. काही ठिकाणी तुरुंगात असलेल्या आरोपीच्या नावावर मतदान झाल्याचे आरोप झाले. बाणेर आणि धायरी भागात दोन गटांमध्ये मारामारीच्या घटना घडल्या.

 

मतदानाची टक्केवारी
दुपारी 1.30 वाजेपर्यंत पुण्यात 26.28 टक्के मतदान झाले होते, तर सायंकाळी 3.30 वाजेपर्यंत हे प्रमाण 36.95 टक्क्यांपर्यंत वाढले. 2017 मध्ये पुण्यात 55.60 टक्के मतदान झाले होते आणि यंदाही अंतिम आकडा साधारण त्या आसपास राहण्याची शक्यता आहे. पिंपरी–चिंचवडमध्ये सकाळी 7.30 वाजता मतदान सुरू झाले. दुपारी 3.30 वाजेपर्यंत 40.5 टक्के मतदान नोंदले गेले होते. अंतिम मतदान सुमारे 65 टक्क्यांपर्यंत जाण्याची शक्यता वर्तवली जात आहे. येथे 32 प्रभागांतील 128 जागांसाठी 681 उमेदवार रिंगणात आहेत.

 

उद्या मतमोजणी

पुण्यातील 15 विभागीय कार्यालयांमध्ये आज मतमोजणी होणार आहे. दुपारी निकालांचे स्पष्ट चित्र समोर येण्याची शक्यता आहे. या निवडणुकीत भाजप आणि राष्ट्रवादी काँग्रेस यांच्यात थेट लढत झाली होती. प्रचारादरम्यान केंद्रीय राज्यमंत्री मुरलीधर मोहोळ आणि उपमुख्यमंत्री अजित पवार यांच्यात आरोप–प्रत्यारोप झाले. “पुण्याचा कारभारी बदला” हा अजित पवारांचा नारा आणि “आम्हाला कोणाची गरज नाही” असा मोहोळांचा दावा यामुळे निवडणूक चुरशीची ठरली. पुणेकरांचा कौल आज मतमोजणीतून स्पष्ट होणार आहे.

 

 

 

 

❓ (प्रश्न–उत्तर)
Q1. पुण्यात किती टक्के मतदान झाले?
➡️ अंदाजे 50 ते 55 टक्के मतदान झाले आहे.

Q2. ईव्हीएम बिघाड कुठे झाला?
➡️ प्रभाग 39 (हुजूरपागा), प्रभाग 40 (येवलेवाडी) आणि प्रभाग 41 मध्ये मशीन बदलावी लागली.

Q3. शाई पुसण्याचा प्रकार कुठे घडला?
➡️ धायरी भागात शाई पुसल्याच्या संशयावरून एका व्यक्तीस मारहाण करण्यात आली.

Q4. पिंपरी-चिंचवडमध्ये किती मतदान झाले?
➡️ अंदाजे 65 टक्क्यांपर्यंत मतदान झाले आहे.

Q5. मतमोजणी कधी?
➡️ आज, पुण्यातील 15 केंद्रांवर मतमोजणी होणार आहे.