पुणे : पुणे जिल्ह्यातील जिल्हा परिषद पुणे शाळांमध्ये आता इयत्ता दहावीपर्यंत वर्ग सुरू करण्याचा महत्त्वपूर्ण निर्णय घेण्यात आला आहे. राज्य शासनाच्या निर्देशानुसार आवश्यक विद्यार्थीसंख्या पूर्ण करणाऱ्या शाळांना उच्च वर्गांना मान्यता दिली जाणार असल्याची माहिती मुख्य कार्यकारी अधिकारी गजानन पाटील यांनी दिली. सध्या जिल्हा परिषद शाळांमध्ये सुमारे 2.3 लाख विद्यार्थी शिक्षण घेत असून, 11,228 शिक्षक कार्यरत आहेत. बहुतांश शाळा चौथी किंवा सातवीपर्यंतच असल्याने विद्यार्थ्यांना पुढील शिक्षणासाठी इतर शाळांमध्ये जावे लागत होते. या पार्श्वभूमीवर दहावीपर्यंत वर्ग सुरू करण्याचा निर्णय अत्यंत महत्त्वाचा मानला जात आहे. (pune zp schools 10th classes modern labs plan)
पुण्यात मोठी अ‍ॅक्शन: प्रदूषण करणारे RMC आणि हॉटमिक्स प्लांट शहराबाहेर !
गजानन पाटील यांनी सांगितले की, शाळांमध्ये वर्गवाढीचे अधिकार आता जिल्हा परिषदेला देण्यात आले आहेत. शासनाच्या नियमानुसार उच्च वर्ग सुरू करण्यासाठी किमान 25 विद्यार्थ्यांची आवश्यकता आहे. उदाहरणार्थ, एखाद्या शाळेत आठवीपर्यंत वर्ग असल्यास नववी सुरू करण्यासाठी किमान 25 विद्यार्थी असणे आवश्यक आहे. हा निकष पूर्ण करणाऱ्या शाळांमध्ये टप्प्याटप्प्याने दहावीपर्यंतचे वर्ग सुरू करण्यात येणार आहेत. तसेच शिक्षकांच्या रिक्त पदांसाठी ‘पवित्र’ प्रणालीद्वारे भरती प्रक्रिया सुरू आहे.
गेल्या वर्षी जिल्ह्यातील जोगिंदर नगर येथील जिल्हा परिषद शाळेला जागतिक स्तरावर “सर्वोत्कृष्ट शाळा” म्हणून गौरविण्यात आले होते. त्यानंतर राज्याचे शालेय शिक्षण मंत्री दादा भुसे यांनी शाळेला भेट देऊन शिक्षक दत्तात्रय वारे आणि ग्रामस्थांचा सत्कार केला होता. या यशस्वी मॉडेलचा विस्तार आता जिल्ह्यातील आणखी 25 शाळांमध्ये करण्यात येणार आहे.
100 आधुनिक प्रयोगशाळांची उभारणी
जिल्हा परिषदेकडून विविध शाळांमध्ये 100 आधुनिक प्रयोगशाळा उभारण्याचा निर्णय घेण्यात आला आहे. यामध्ये रोबोटिक्स, अटल टिंकरिंग, एआर-व्हीआर, खगोलशास्त्र आणि कौशल्य विकास प्रयोगशाळांचा समावेश आहे. प्रत्येक प्रयोगशाळेसाठी सुमारे 10 लाख रुपयांचा खर्च अपेक्षित असून, विद्यार्थ्यांना आधुनिक आणि कौशल्याधारित शिक्षण देण्याचा यामागचा उद्देश आहे.
