पुणे गणेश विसर्जन मिरवणुकीवर २ हजार कॅमेऱ्यांची नजर; १० हजार पोलिसांचा बंदोबस्त

पुणे, वैभवशाली गणेशोत्सवाची सांगत शुक्रवारी होत असून, आकर्षणाचे केंद्र बिंदू असलेल्या विसर्जन मिरवणूकीत सुरक्षित आणि शिस्तबद्ध वातावरणात पार पाडण्यासाठी पुणे पोलिसांनी टेक्नॉलिजीचा वापर केला आहे. मध्यवर्ती भागातील मुख्य मिरवणूक मार्गांसह शहरात तब्बल २ हजार सीसीटीव्ही कॅमेऱ्यांची कडक नजर असणार आहे. तसेच ध्वनिप्रदूषण, गर्दी व्यवस्थापन आणि कायदा-सुव्यवस्थेच्या दृष्टीने नियमांचे उल्लंघन करणाऱ्यांवर कठोर कारवाईचा इशारा पोलिस आयुक्त अमितेश कुमार यांनी दिला आहे. यंदा तब्बल दहा हजार पोलिसांचा फौजफाटा रस्त्यावर तैनात असणार आहे.

गणेश विसर्जन मिरवणुकीच्या पार्श्वभूमीवर आयोजित पत्रकार परिषदेत पोलिस आयुक्त अमितेश कुमार यांनी बंदोबस्ताची माहिती दिली. यावेळी सह पोलिस आयुक्त संजय दराडे, अप्पर आयुक्त मनोज पाटील, संजय बनसोडे, संजय पाटील व वरिष्ठ अधिकारी उपस्थित होते.

पोलिस आयुक्त, सह पोलिस आयुक्त यांच्या देखरेखीखाली चार अप्पर आयुक्त तसेच वरिष्ठ अधिकाऱ्यांसह १० हजार पोलिसांचा बंदोबस्त सकाळी ९ वाजल्यापासून तैनात असणार आहे. हा बंदोबस्त मिरवणूकसंपेपर्यंत सुरू राहील. यासोबतच सीसीटीव्हीवरून मोठ्या प्रमाणात बंदोबस्तावर नजर ठेवली जाणार आहे.गणेशोत्सव आणि विसर्जन सोहळा शांततेत, उत्साहात आणि सुरक्षित वातावरणात पार पाडण्यासाठी सर्व नागरिक, गणेश मंडळांचे कार्यकर्ते आणि स्वयंसेवकांनी पोलिसांना सहकार्य करावे, असे आवाहन पोलीस आयुक्त अमितेश कुमार यांनी केले आहे.

सीसीटीव्ही आणि वॉचटॉवरची कडक नजर : अलका टॉकीज चौक, टिळक रस्ता, कुमठेकर रस्ता, लक्ष्मी रस्ता आणि केळकर रस्ता या महत्त्वाच्या परिसरांवर पोलिसांचे विशेष लक्ष असेल. चार रस्त्यांसह मध्यभागात सीसीटीव्ही कॅमेऱ्यांचे जाळे उभारले आहे. नियंत्रण कक्षातून विशेष पथकाद्वारे ते गणेश विसर्जन मिरवणूकीवर लक्ष ठेवून असणार आहेत. २ हजार कॅमेऱ्यांच्या माध्यमातून प्रत्येक घडामोडीवर सूक्ष्म लक्ष ठेवले जाणार आहे. आवश्यक ठिकाणी वॉचटॉवर उभारून त्यातूनही मिरवणुकीवर नजर ठेवली जाणार आहे.

ध्वनिप्रदूषणावर थेट गुन्हे :  ध्वनीमर्यादेचे पालन तसेच वेळेचे उल्लंघन करणे बंधनकारक आहे. नियमबाह्य ढोल-ताशा पथके, लेझर लाईट्स आणि हाय-डेसिबल डीजे सिस्टीमवर कडक निर्बंध असून, ध्वनीप्रदूषणाच्या नियमांचे उल्लंघन करणाऱ्यांवर थेट गुन्हे दाखल करून कारवाई केली जाईल, असा स्पष्ट इशारा पोलिसांनी दिला आहे.

गर्दी व्यवस्थापन; रुग्णवाहिकांसाठी मार्ग : गणेशभक्तांची मोठी गर्दी लक्षात घेता लक्ष्मी रस्ता व इतर मुख्य मार्गांवर वाहतूक आणि गर्दीचे नियोजन केले आहे. मिरवणुकीत वाहतुकीची हालचाल सुरळीत राहण्यासाठी विशेष व्यवस्था केली आहे.आपत्कालीन परिस्थितीत रुग्णवाहिका व अग्निशामक दलाच्या गाड्यांना विनाअडथळा मार्ग मिळावा, यासाठी स्वतंत्र मार्ग तयार ठेवले आहेत.

गुन्हेगारांवर करडी नजर : रेकॉर्डवरील गुन्हेगार, तडीपार व्यक्ती आणि मिरवणुकीत अनुचित प्रकार घडविणाऱ्यावर पोलिसांचे बारीक लक्ष असेल. अशा व्यक्तींवर प्रतिबंधात्मक कारवाई करण्याबरोबरच मिरवणुकीदरम्यान त्यांच्या हालचालींवरही नजर ठेवली जाणार आहे. नागरिकांच्या सुरक्षेसाठी साध्या वेषातील पोलिस कर्मचारी आणि विशेष महिला पथके तैनात असणार आहेत.