पुणे : पुणे, पिंपरी-चिंचवडसह सांगली, सोलापूर आणि कोल्हापूर जिल्ह्यांतील म्हाडाच्या घरांची वाट पाहणाऱ्या हजारो नागरिकांची प्रतीक्षा आता संपण्याच्या मार्गावर आहे. महाराष्ट्र गृहनिर्माण व क्षेत्रविकास प्राधिकरण (म्हाडा) – पुणे मंडळांतर्गत विविध गृहनिर्माण योजनांतील एकूण 4,486 सदनिकांची संगणकीय सोडत मंगळवार, 10 फेब्रुवारी 2026 रोजी दुपारी 12 वाजता काढण्यात येणार असल्याची माहिती म्हाडा सूत्रांनी दिली आहे. (mhada pune lottery 2026 4486 houses draw)
ही सोडत पुणे जिल्हा परिषदेच्या शरदचंद्र पवार सभागृहात पार पडणार आहे. पुणे मंडळाचे सभापती शिवाजीराव आढळराव पाटील यांच्या हस्ते सोडत प्रक्रिया पार पडेल. तसेच म्हाडाचे उपाध्यक्ष तथा मुख्य कार्यकारी अधिकारी संजीव जयस्वाल मुंबईहून व्हिडिओ कॉन्फरन्सिंगद्वारे या कार्यक्रमाला उपस्थित राहणार आहेत.
अर्जदारांचा उत्स्फूर्त प्रतिसाद
पुणे मंडळाच्या या गृहनिर्माण सोडतीला सर्वसामान्य नागरिकांकडून मोठा प्रतिसाद मिळाला आहे.
* एकूण उपलब्ध सदनिका : 4,486
* एकूण अर्ज प्राप्त : 2,58,832
* EMD भरलेले पात्र अर्जदार : 2,15,965
म्हाडाच्या नियमानुसार, विहित मुदतीत अनामत रकमेचा (EMD) भरणा केलेल्या अर्जदारांनाच अंतिम सोडतीत सहभागी होता येणार आहे. त्यामुळे उद्याच्या सोडतीत केवळ पात्र अर्जदारांचाच समावेश केला जाणार आहे.
कोणत्या योजना व भागांचा समावेश?
या सोडतीत पुणे व पिंपरी-चिंचवड महानगरपालिका हद्दीसह पुणे महानगर प्रदेश विकास प्राधिकरण (PMRDA) क्षेत्रातील घरे समाविष्ट आहेत.
* 20 टक्के सर्वसमावेशक गृहनिर्माण योजना – 3,322 सदनिका
* 15 टक्के सामाजिक गृहनिर्माण योजना – 864 सदनिका
अर्जदारांच्या विनंतीनुसार आणि काही तांत्रिक अडचणींमुळे तसेच निवडणूक आचारसंहितेच्या पार्श्वभूमीवर अर्ज भरण्याची मुदत दोन वेळा वाढविण्यात आली होती.
घरबसल्या पाहता येणार थेट सोडत
सोडत प्रक्रिया पारदर्शक ठेवण्यासाठी म्हाडा प्रशासनाने ऑनलाईन थेट प्रक्षेपणाची सोय उपलब्ध करून दिली आहे. पात्र अर्जदारांना त्यांच्या नोंदणीकृत मोबाईल क्रमांकावर थेट प्रक्षेपणाची लिंक पाठवण्यात आली आहे. तसेच म्हाडाच्या अधिकृत YouTube चॅनेलवर दुपारी 12 वाजल्यापासून सोडतीचे थेट प्रक्षेपण पाहता येणार आहे. म्हाडा प्रशासनाने जास्तीत जास्त अर्जदारांनी ऑनलाईन माध्यमातून सोडत प्रक्रिया पाहून या पारदर्शक उपक्रमाचा लाभ घ्यावा, असे आवाहन केले आहे.
घराच्या स्वप्नाकडे मोठे पाऊल
पुणे आणि परिसरात घरांच्या वाढत्या किमतींच्या पार्श्वभूमीवर म्हाडाची ही सोडत मध्यमवर्गीय आणि सर्वसामान्य नागरिकांसाठी मोठी संधी मानली जात आहे. हजारो कुटुंबांच्या ‘स्वतःच्या घराचे’ स्वप्न साकार करण्याच्या दिशेने ही सोडत महत्त्वाची ठरणार आहे.
प्रश्न उत्तर
प्र. सोडत कधी आणि किती वाजता आहे?
10 फेब्रुवारी 2026, दुपारी 12 वाजता.
प्र. एकूण किती घरे उपलब्ध आहेत?
4,486 सदनिका.
प्र. किती अर्जदार पात्र ठरले आहेत?
2,15,965 अर्जदारांनी EMD भरल्यामुळे ते पात्र आहेत.
प्र. सोडत कुठे होणार आहे?
पुणे जिल्हा परिषद, शरदचंद्र पवार सभागृह.
प्र. सोडत लाईव्ह पाहता येईल का?
हो. मोबाईलवर लिंक मिळेल आणि अधिकृत YouTube चॅनेलवर थेट प्रसारण होईल.
