महात्मा फुले जन आरोग्य योजनेत दंत उपचारांचा समावेश – मंत्री हसन मुश्रीफ यांची मोठी घोषणा

पुणे : महात्मा ज्योतिबा फुले जन आरोग्य योजनेअंतर्गत तोंडाच्या शस्त्रक्रियेशी संबंधित दंत उपचारांचा समावेश करण्यात आल्याने सर्वसामान्य नागरिकांना सुलभ मौखिक आरोग्यसेवा मिळण्याचा मार्ग मोकळा झाला आहे. तोंडाचा कर्करोग, दातांमध्ये कीड आणि हिरड्यांचे आजार यांसारख्या गंभीर समस्यांवर वेळेत उपचार मिळणे गरजेचे असून, विशेषतः ग्रामीण भागातील नागरिकांना गुणवत्तापूर्ण आणि प्रतिबंधात्मक आरोग्यसेवा उपलब्ध करून देण्यासाठी वैद्यकीय संस्थांनी पुढाकार घ्यावा, असे प्रतिपादन राज्याचे वैद्यकीय शिक्षण मंत्री हसन मुश्रीफ यांनी केले.

एम. ए. रंगूनवाला कॉलेज ऑफ डेंटल सायन्सेस अँड रिसर्च सेंटरतर्फे आझम कॅम्पस येथे आयोजित २० व्या पदवीदान समारंभात ते बोलत होते. यावेळी प्राचार्य डॉ. रमनदीप दुगल, उपप्राचार्य डॉ. सलीका शेख, डॉ. विवेक हेगडे, सचिव प्रा. इरफान शेख तसेच प्राध्यापक आणि विद्यार्थी उपस्थित होते.

मुश्रीफ म्हणाले की, महाराष्ट्र शासन महाराष्ट्र आरोग्य विज्ञान विद्यापीठाच्या ‘सेंटर्स ऑफ एक्सलन्स’, आंतरवासिता कार्यक्रम आणि जागतिक सहकार्य उपक्रमांद्वारे आरोग्य शिक्षणाचा दर्जा उंचावण्यासाठी कटिबद्ध आहे. डिजिटल साधने, कृत्रिम बुद्धिमत्ता (AI), सिम्युलेशन-आधारित शिक्षण आणि कमीत कमी हस्तक्षेप करणाऱ्या उपचार पद्धतींमुळे दंतवैद्यक क्षेत्र झपाट्याने विकसित होत आहे. त्यांनी विद्यार्थी आणि प्राध्यापकांना नवकल्पना, संशोधन आणि स्वदेशी विकासावर लक्ष केंद्रित करण्याचे आवाहन केले. “भारताकडे केवळ तंत्रज्ञान वापरण्याचीच नव्हे, तर ते निर्माण करण्याची ही क्षमता आहे,” असेही ते म्हणाले.

एम. ए. रंगूनवाला कॉलेज ऑफ डेंटल सायन्सेस अँड रिसर्च सेंटरच्या २५ वर्षांच्या प्रवासाचा उल्लेख करताना त्यांनी संस्थेच्या कामगिरीचे कौतुक केले. आजपर्यंत संस्थेने १,३८२ दंत पदवीधर आणि ५०५ पदव्युत्तर विद्यार्थी घडविले असून, जागतिक स्तरावर माजी विद्यार्थ्यांचे मजबूत नेटवर्क निर्माण केले आहे.

संस्थेने व्हिएन्ना विद्यापीठ, किंग्स कॉलेज लंडन, जे. मोरिटा जपान, एंडोस्टार पोलंड आणि एमआयटी कॉलेज ऑफ इंजिनिअरिंग यांसारख्या आंतरराष्ट्रीय संस्थांशी सामंजस्य करार केले आहेत. या सहकार्यामुळे संस्थेचे शैक्षणिक आणि संशोधन क्षेत्रातील योगदान अधिक मजबूत झाले आहे. समारोपात मंत्री मुश्रीफ यांनी नव्या पदवीधरांना संदेश देताना सांगितले की, “कौशल्य तुम्हाला यश देईल, नैतिकता आदर मिळवून देईल आणि करुणा तुम्हाला कायम स्मरणात ठेवेल.” समाजासाठी संवेदनशील आणि सेवाभावी आरोग्य सेवक घडविण्याची जबाबदारी संस्थांवर असल्याचेही त्यांनी नमूद केले.