पुणे, परराज्यातून महाराष्ट्रात होणाऱ्या अवैध मद्य तस्करीविरोधात राज्य उत्पादन शुल्क विभाग, पुणे यांनी मोठी कारवाई करत दोन स्वतंत्र ऑपरेशन्समध्ये पाच आरोपींना अटक केली असून वाहनांसह सुमारे ४८ लाख रुपयांचा मुद्देमाल जप्त करण्यात आला आहे.
पुणे–सोलापूर महामार्गावरील उरुळी कांचन गावाच्या हद्दीत गोपनीय माहितीच्या आधारे राज्य उत्पादन शुल्क विभागाच्या ‘के’ विभागाच्या पथकाने चारचाकी वाहन (MH12 MR 1904) तपासले. या वाहनातून गोवा राज्यात निर्मित विदेशी मद्याच्या विविध ब्रँडच्या मोठ्या प्रमाणात बाटल्या आढळून आल्या. वाहनचालकास तात्काळ अटक करण्यात आली.
पुढील तपासात या प्रकरणातील मुख्य सूत्रधारास करमाळा (जि. सोलापूर) येथून अटक करण्यात आली. या कारवाईत एकूण तीन आरोपींना अटक करून वाहनासह ४ लाख ७१ हजार ७८० रुपयांचा मुद्देमाल जप्त करण्यात आला.
सातारा–पुणे महामार्गावर ट्रकवर छापा
दुसऱ्या कारवाईत सासवड विभागाच्या पथकाने सातारा–पुणे राष्ट्रीय महामार्गावरील सारोळा गावाच्या हद्दीत सापळा रचून सहाचाकी ट्रक (MH12 SI 25918) तपासला. औषधांच्या आडून गोवा राज्यात विक्रीसाठी असलेले विदेशी मद्य वाहतूक होत असल्याचे उघडकीस आले. या प्रकरणात ट्रक व एका चारचाकी वाहनासह मोठ्या प्रमाणात मद्य जप्त करण्यात आले असून दोन आरोपींना अटक करण्यात आली आहे. या कारवाईत एकूण ४३ लाख ५७ हजार ४०० रुपयांचा मुद्देमाल जप्त करण्यात आला.
निवडणूक पार्श्वभूमीवर २१ पथके कार्यरत
ही कारवाई आयुक्त, राज्य उत्पादन शुल्क, मुंबई राजेश देशमुख, सह-आयुक्त (अंमलबजावणी व दक्षता) प्रसाद सुर्वे, विभागीय उपआयुक्त सागर धोमकर यांच्या आदेशानुसार तसेच अधीक्षक अतुल कानडे यांच्या मार्गदर्शनाखाली करण्यात आली.
जिल्ह्यातील दोन महानगरपालिकांच्या निवडणुकांच्या पार्श्वभूमीवर मतदारांना प्रलोभन देण्यासाठी परराज्यातील स्वस्त दारू येण्याची शक्यता लक्षात घेऊन २१ विशेष पथके कार्यरत ठेवण्यात आली आहेत. सराईत गुन्हेगारांवर पाळत, रात्रगस्त आणि वाहनांची कसून तपासणी करण्याचे निर्देश देण्यात आले आहेत.
माहितीसाठी टोल फ्री क्रमांक
अवैध मद्य निर्मिती, वाहतूक व विक्रीबाबत कोणतीही माहिती असल्यास नागरिकांनी टोल फ्री क्रमांक: १८००-२३३-९९९९ किंवा दूरध्वनी: ०२०-२६१२७३२१ वर संपर्क साधावा, असे आवाहन राज्य उत्पादन शुल्क विभागाकडून करण्यात आले आहे.
