महिला आरोग्य अधिकाऱ्यांशी गैरवर्तन भाजप नेत्याला भोवले ; पुणे महापालिकेत प्रवेश बंदी !

पुणे, ६ जून २०२५ : पुणे महानगरपालिकेतील महिला आरोग्य अधिकाऱ्यांवर केलेल्या गैरवर्तन प्रकरणात भाजपच्या कामगार मोर्चाचे शहराध्यक्ष ओंकार कदम आणि अक्षय कांबळे यांच्यावर महापालिकेने कडक कारवाई करत तात्काळ प्रवेशबंदी लागू केली आहे.  (PMC entry ban on BJP leaders)

 

आरोग्य विभागाच्या सी.एच.एस. विभागात १७ फेब्रुवारी २०२५ रोजी घडलेल्या घटनेनंतर, या दोघांविरोधात महिलांच्या आयोगाकडे तक्रार दाखल करण्यात आली होती. त्यांनी महिला अधिकाऱ्यांना त्यांच्या कामादरम्यान त्रास दिला, विनापरवानगी व्हिडिओ शूट केला, धमकावले, अश्लील भाषा वापरली आणि कार्यालयात गोंधळ घालून अधिकाऱ्यांना दालनाबाहेर जाण्यापासून रोखण्याचा प्रयत्न केला, असा आरोप आहे.

 

महापालिकेतील महिला अधिकाऱ्याचा धक्कादायक आरोप – भाजप पदाधिकाऱ्यावर मानसिक छळाची तक्रार

 

या घटनेनंतर “कामाच्या ठिकाणी महिलांचा लैंगिक छळ (प्रतिबंध, मनाई आणि निवारण) कायदा, २०१३” अंतर्गत तक्रार दाखल झाली. महानगरपालिकेच्या अंतर्गत तक्रार समितीने सखोल चौकशी करून अहवाल सादर केला आणि अशा प्रकारांना आळा घालण्याची शिफारस केली.  (pmc entry ban on bjp leaders for misbehaving with health officers)

 

 

याच पार्श्वभूमीवर, पुणे महापालिकेने रात्री उशिरा आदेश जारी करत ओंकार कदम व अक्षय कांबळे यांना महापालिकेच्या मुख्यालयासह सर्व कार्यालयांमध्ये पुढील आदेशापर्यंत प्रवेशबंदी घातली आहे. या आदेशात नमूद करण्यात आले आहे की, संबंधित व्यक्तींनी कार्यालयात प्रवेश करण्याचा प्रयत्न केल्यास, सुरक्षा रक्षकांनी तातडीने पोलीस ठाण्यात तक्रार दाखल करून कायदेशीर कारवाई करावी.

 

दरम्यान, या दोघांनी सायंकाळी पत्रकार परिषद घेत आरोप फेटाळले. त्यांनी महापालिकेच्या आरोग्य विभागातील कथित घोटाळा उघड होण्याच्या भीतीने हे आरोप करण्यात आले असल्याचा दावा केला.

 

पुणे महानगरपालिकेने स्पष्ट केले आहे की, कर्मचाऱ्यांवर दबाव टाकणाऱ्या, धमकावणाऱ्या आणि गुन्हेगारी स्वरूपाचे वर्तन करणाऱ्या व्यक्तींविरोधात कठोर कारवाई करण्यात येईल. महिला कर्मचाऱ्यांच्या सुरक्षिततेस सर्वोच्च प्राधान्य दिले जाईल, असेही प्रशासनाने स्पष्ट केले आहे. (PMC entry ban on BJP leaders)

 

👉 “source : pmc internal order